Turmush — Ош облусунун Өзгөн районунун тургуну — үч эм төрөгөн энеге 100 миң сом берилди. Бул тууралуу президенттин облустагы өкүлчүлүгүнөн билдиришти.
2026-жылдын 20-февралында Ош облустар аралык бириккен клиникалык ооруканасынын төрөт стационарында Өзгөн районунун Кароол айыл аймагына караштуу Мырза-Арык айылынын тургуну Мавлюда Бердигулова үч эмди жарыкка алып келген.
Бүгүн, 25-мартта облус жетекчилиги 3 эм төрөлгөн үй-бүлөгө барып, 100 миң сом тапшырды.
Мавлюда Бердигулова үч кыз төрөгөн. Дарыгерлердин маалыматына караганда, алардын абалы жакшы.
Наристелерге Аиша, Айчырай жана Адинай деген ысымдар берилген. Алар 4-мартта төрөтканадан үйүнө чыгарылган.
Буга чейин Turmush аталган ымыркайлар Ош облустар аралык бириккен клиникалык ооруканасында 2026-жылы төрөлгөн биринчи 3 эм экенин жазган.
Төрөлгөн учурда салмактары 1 кг 800 гр, 2 кг 220 гр жана 2 кг 320 гр болгон.
-----------------------------------------------------------------
Ал эми 2026-жылдын 12-мартында Ош облустар аралык бириккен клиникалык ооруканасынын төрөт стационарында операция жолу (кесарево) менен төрт эм төрөлдү.
Ымыркайларга Сабия, Юсуф, Афруза жана Рабия ысымдары ыйгарылды. Алар 26 жаштагы Дилшода Артыкова менен жолдошу Жасур Садыковдун алгачкы балдарды.
Президент Садыр Жапаровдун атынан төрт эм төрөлгөн үй-бүлөгө үч бөлмөлүү батир белекке берилди.