Turmush — Кыргыз-Өзбек эл аралык университетинде өзбек тилдүү мектептер үчүн окуу куралы даярдалды.
Окуу жайдын маалыматына караганда, өзбек тилдүү мектептер үчүн окуу куралдарын даярдоо борбору тарабынан 7-8-класстар үчүн адам жана коом (инсон ва жамият) аталышындагы окуу куралы ушул эле аталыштагы предмет мугалими үчүн атайын усулдук колдонмо даярдалып жарык көрдү. Бул 11 жылдык мектептик билим берүү багытындагы мамлекеттик стандарттын негизинде жарык көргөн акыркы окуу куралдарынын катарын толуктайт.
2024-жылдын 30-октябрындагы өкмөттүн «Кыргыз Республикасында 12 жылдык мектептик билим берүүгө өтүү концепциясын бекитүү жөнүндөгү» токтомуна ылайык, 1-5-класстардын окуу куралдары үчүн жаңы стандарттын негизинде окуу куралдарын даярдоо тапшырмасы коюлган.
КӨЭАУнун алдындагы окуу куралдарын даярдоо борбору «12 жылдык мектептик билим берүүгө өтүүнүн» алгачкы этабы катары өлкөдөгү өзбек тилдүү мектептер үчүн 1-5-класстардын окуу куралдарына мамлекеттик жаңы стандарттын негизинде дидактикалык материалдарды которуп, окуу куралдарын, предмет мугалимдери үчүн усулдук колдонмолорду даярдоонун үстүндө иш алып барууда.
1998-жылы ишмердигин баштаган Кырыгыз-Өзбек эл аралык университетинин алдындагы окуу куралдарын даярдоо борборунун кызматкерлери 2004-жылы «Илим жана техника» багытында мамлекеттик сыйлыктын ээси болгон. Бүгүнкү күнгө чейин борбор тарабынан 172 аталыштагы окуу куралдары 2 миллиондон ашык нускада жарык көрүп, өзбек тилдүү мектептерге таркатылган.