Turmush — Ош шаарында «Мухаммед-Умар Ош» коомдук бирикмеси азанды туура жана көркөм айтуу боюнча мелдеш өткөрдү.
Аталган мелдешке Кыргызстан, Өзбекстан, Казакстан өлкөсүнөн жалпы 300дөн ашуун азанчы катышып, алардын ичинен финалга 12 катышуучу тандалып алынды. Иш-чара коңшу өлкөлөрдүн ортосундагы мамилени, ынтымакты бекемдөө, азанды көркөм айткан азанчыларды даңазалоо максатында уюштурулду.
Иш-чарага Кыргызстан мусулмандарынын дин башкармалыгынын башчысынын орун басары Абибилла Кудайбердиев, Жогорку Кеңештин депутаты Сүйүн Өмүрзаков, аалымдар — Олжобай Алимбеков, Убайдулла Сарыбаев жана башка аалымдар катышты.
Азан айтуу боюнча мелдештин жыйынтыгы менен мыктылар аныкталды. Алдыңкы орундарга төмөнкү мамлекеттин катышуучулары татыды:
- 1-орун — Дадаев Хамзабек (Өзбекстан);
- 2-орун — Жуманалиев Сүйүн (Кыргызстан);
- 3-орун — Сейтканов Куаныш (Казакстан);
- 4-орун — Дастан Курбаналиев (Кыргызстан).
1-орун үчүн умрага жолдомо, 2-3-орундар үчүн ноутбук, сыналгы тапшырылды.
Мелдештин жүрүшүндө Казакстандан Еркинбек Шокай дамылла, Өзбекстандан Абдулла Хайдаров кары, египеттик Умар кары, Нурали Жолдубаев кары калыстык кылды.