Turmush — Ош технологиялык университетинин экономика жана башкаруу факультетинин бүтүрүүчүлөрү үчүн бүтүрүү аземи өткөрүлдү. Бул тууралуу окуу жайдын басма сөз кызматы билдирди.
Маалыматка караганда, университетте 4 жыл билим алып, өздөрү тандаган кесиптин ээси болгон жаштар үчүн экономика жана башкаруу факультетинин жалпы жамааты, университет жетекчилиги салтанаттуу иш-чара уюштуруп, аларды окуу жайдан шаңдуу узатышты. Салтанатка бүтүрүүчүлөр, окуу жайдын жетекчилиги, факультеттин жамааты жана сырттан келген коноктор катышты.
Факультетти бир канча жыл мурун бүтүрүп, өз кесиби менен эмгек жолдорун улантып жаткан бүтүрүүчүлөр чакырылып, алар өз кезегинде өздөрү окуган адистиктин бүгүнкү күндөгү ролу, жашоодо тийгизген пайдасы жөнүндө маалыматтарды беришти. Ошондой эле аларга дагы билим берип, белгилүү бир кесиптин ээси болууга түрткү болгон факультеттин жалпы жамаатына ыраазычылык билдиришти.
Университет жетекчилиги, факультет тарабынан бүтүрүүчүлөргө куттуктоолор айтылып, университеттин жана факультеттин коомдук иштерине активдүү катышып, ийгиликтерди жараткан бүтүрүүчүлөргө ардак грамоталар менен бирге баалуу белектер тапшырылды.
«Майрамдык салтанат шаңдуу уланып, жагымдуу музыка коштогон ырлар жаңырды. Ал эми бул иш чаранын негизги максаты университетти аяктап, чоң турмушка сапар алган бүтүрүүчүлөрдүн коомдо өз ордуларын татыктуу табууга, өз кесибин сүйүүгө чакыруу болуп саналат.
Экономика жана башкаруу факультети Кыргызстандын түштүк аймагында биринчилерден болуп экономика багытындагы адистерди даярдап баштаган. Эл аралык Болондук окутуу системасын киргизүүдө дагы биринчи болуп пилоттук факультет катары тандалып алынган. Факультет өзүнүн көп жылдык тарыхында Кыргызстандын эл чарбасына жана өндүрүшүнө бир нече миңдеген экономика багытындагы жогорку квалификациялуу адистерди даярдап берди. Учурда факультеттин бүтүрүүчүлөрү өз адистиктери менен өлкөбүздөн тышкары алыскы жана жакынкы коңшулаш чет мамлекеттерде ийгиликтүү эмгектенип жатышат», - деп айтылат маалыматта.