Turmush — Ош шаарында Евразиялык экономикалык биримдиктин талаптарына жооп берген мал союучу жай ачылып, иштей баштады.
Эксперттер аталган мал союучу жайда союлган малдын эти ЕАЭБден башка дагы өлкөлөргө экспорттолушу мүмкүн экенин божомолдошууда. Анткени жаңы курулган мал союучу жайдын атайын фермасы бар жана ошол жактагы мал союлат. Мындай тартипте иштеген мал союучу жайлар Иран жана араб өлкөлөрү үчүн маанилүү. Атайын фермада багылган малдын этине да дүйнөлүк базарда суроо-талап жогору болот.
ЕАЭБге Кыргызстан, Россия, Армения, Казакстан жана Беларусь Республикасы кирет.
Ветеринардык жана фитосанитардык коопсуздук боюнча мамлекеттик инспекциянын Ош шаарындагы башчысы Сүйүн Абдуллаевдин айтымында, акыркы учурларда дүйнөлүк талаптарга жооп берген мал союучу жайларга суроо-талап күчөдү. Чет өлкөлүк эт сатып алуучулар фермада багылган малдын тоютуна көңүл бурушат. Ал эми жаңы ачылган мал союучу жай чет өлкөлүк сатып алуучулардын талаптарына толук жооп берет.
«Элди коопсуз эт менен камсыздай алчу мал союучу жай ачылды. ЕАЭБге мүчө өлкөлөрдөн сырткары Кытай, Тажикстан, Өзбекстан жана араб өлкөлөрүнө эт экспорттоо багытында сүйлөшүүлөр жүрүп жатат. Жаңы ачылган мал союучу жайдын артыкчылыгы — союла турчу малдар атайын фермада багылат. Бул эт керектөөчүлөр үчүн маанилүү фактор», - деди С.Абдуллаев.
Анын айтымында, мал союучу жайда эки муздаткыч бар. Анын бирөөсү -1 градуста, экинчи муздаткыч -20 градуста эт сактайт. Мисалы, Иран мамлекети -20 градуста сакталган этке көңүл бурат.
Мал союучу жайдын ээси Курсант Сатыбалдиев аталган жайды ЕАЭБдин талаптарына ылайык куруп, этти экспорттоо азыркы замандын талабы экенин айтты.
«Эттерди экспортко чыгара турган заманбап ишкана ачтык. Мал союучу жайдын ичиндеги жабдыктарды Россия Федерациясынын Татарстан Республикасынын борбору болгон Казань шаарынан алып келдик. Анткени жабдыктарыбыз ХАССПтын (Hazard Analysis and Critical Control Points — тамак-аш продукциясынын коопсуздугун аныктай турчу стандарт) талаптарына ылайык келиши керек болчу», - деди К.Сатыбалдиев.
Жаңы ачылган мал союучу жайда 40 адам жумуш менен камсыз болду. Күнүнө 50-60 бодо мал, 170-180 майда жандык союлат. Эки муздаткычка тең 30 тоннадан эт батат.
Ишкананын ачылышына Ош шаарынын биринчи вице-мэри Саибжан Турдуев жана ОГПИнин ректору катышып, мал союучу жайдын келечеги кең экенин белгилеп, кызыл тасмасын кесишти.