Turmush — Ош технологиялык университетинде «ОшТУ мырзасы-2024» жигиттер сынагы өткөрүлдү. Бул тууралуу аталган окуу жайдан билдиришти.
Маалыматка караганда, сынакка ар бир факультеттен жана гуманитардык-технологиялык колледжден жалпы 8 жигит катышты. Аталган иш-чара жаштар комитети тарабынан жаштарды коомдук иштерге аралаштыруу, студенттердин достук мамилесин чыңдоо, интеллектуалдык жана маданий деңгээлин жогорулатуу, көрүүчүлөрдүн маданий эс алуусун уюштуруу, эстетикалык табитин арттыруу, сергек жана активдүү жашоо образын чагылдыруу, мекенчилдикке тарбиялоо максатында уюштурулду.
Сынактын шартына ылайык жигиттерге улуттук жана классикалык баалуулуктар каралаган ар кандай шарттар коюлду. Мырзалар сахнада өздөрүнүн өнөрлөрүн тартуулашып, сынакка коюлган бардык шарттарды аткарышты.
Сынак калыстар тобу тарабынан бааланып, жыйынтыгында баш байгеге табигый-техникалык факультетинин студенти Самарбек уулу Жылдызбек ээ болуп, «ОшТУ мырзасы» аталды. Ал Ташкент шаарына эс алууга жолдомонун ээси болду. Ошондой эле «Ош шаарынын мырзасы» сынагына катышууга мүмкүнчүлүк алды.
Ал эми 2-орунга технология жана жаратылышты пайдалануу факультетинин студенти Бекмамат уулу Маметиса, 3-орунга экономика жана башкаруу факультетинин студенти Айбек уулу Арлен ээ болушту.
«ОшТУ инстаграм мырзасы» номинациясына Гуманитардык-технологиялык колледжинин студенти Султанбек уулу Мухамедумар ээ болду.
Жеңүүчүлөр университет жетекчилиги жана кесиптик бирлик комитети тарабынан диплом, акчалай жана баалуу белектер менен сыйланышты.