Бөлүмдөр
Ишемби, 24-август
Ош облусу, Ош 21.06.2019 14:33 На русском

Ошко Өзбекстандын акын-жазуучулары келип, эки тилде китеп чыгарууну талкуулашты

Turmush -  Өзбекстандын жана Кыргызстандын акын-жазуучулары «Жүз ыр» аттуу китепти эки тилде басып чыгарууну макулдашты. Бул тууралуу 19-июнда Ош шаарында өткөн кыргыз-өзбек акын-жазуучулардын жолугушуусунда белгилүү болду.

Иш-чарага Өзбекстандын Андижан, Наманган облустарынан жана Ташкент шаарынан жалпы 7 акын, жазуучу келген. Ош шаардык жазуучулар союзунун төрагасы Төрөбай Жороевдин айтымында, аталган жолугушуу эки элдин ортосундагы ынтымакты чыңдоого багытталган.

«Өзбекстандан келген акын, жазуучулар менен канткенде эки элдин чыгармаларын бири-бирибизге тааныта алабыз, кайсы багытта көбүрөөк иштешсек болот деген багытта сүйлөшүүлөрдү жүргүздүк. "Адабият достугу — эл достугу" деп бекеринен айтылган эмес. Себеби учурда Өзбекстанда Чыңгыз Айматовдун ысымы көчөлөргө коюлуп, айкели тургузулду. Анын чыгармалары өзбек тилдерине да которулууда», - дейт Т.Жороев.

Өзбекстан Республикасынын Улуттук жазуучулар союзунун төрагасынын биринчи орун басары Минхожиддин Мирзо Хожиматов алар кыргызстандык жазуучулардын айрым чыгармаларын өзбек тилине которууга кызыкдар экенин билдирди.

«Эки элдин адабиятын, маданиятын кеңири талкууладык жана кыргыз жазуучуларынын тандалма чыгармаларын өзбек тилине которууну сүйлөштүк. Ошондой эле өзбек адабиятындагы чыгармаларды кыргыз тилине которуу боюнча маселелер көтөрүлдү. Кыргызстандык жазуучу, акын досторубуз бизди эң жогорку деңгээлде тосуп алышты», - деди М.Хожиматов.

Андан тышкары Өзбекстандан келген делегацияны өкмөттүн Ош облусундагы өкүлү Узарбек Жылкыбаев да кабыл алды. Жолугушууда 1975-жылдан 1995-жылга чейин чыккан 20 акындын ырлар жыйнагын «Жүз ыр» деген аталышта эки тилде басып чыгаруу боюнча сүйлөшүүлөр жүргөн.

Өзбекстандан келген акын, жазуучулардын делегациясы:

- Өзбекстан Республикасынын Улуттук жазуучулар союзунун төрагасынын биринчи орун басары Минхожиддин Мирзо Хожиматов;

- Өзбек эл жазуучусу Камчыбек Кенжа;

- Өзбекстандын Улуттук жазуучулар союзунун Наманган облусу боюнча төрагасы Жалолиддин Муслим;

- Өзбекстандын Улуттук жазуулар союзунун Андижан облусу боюнча төрайымы Хуршида Кочкорова;

- Өзбекстандын Улуттук жазуучулар союзунун мүчөсү Сражиддин Сайид.

- Өзбекстандын Улуттук жазуучулар союзунун мүчөсү Зиявиддин Маккум;

- «Ешлик» журналынын башкы редактору, Өзбекстандын Улуттук жазуучулар союзунун мүчөсү Фахриддин Хайит.


Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×