Бөлүмдөр
Шаршемби, 17-октябрь
Ош облусу, Ош 03.05.2018 09:12 На русском

Ошто футзал боюнча өлкө чемпиондорун салтанаттуу тосуп алышты (фото, видео)

Turmush -  Ош шаарынын «Erem» командасы футзал боюнча экинчи жолу өлкө чемпиону болду. Анын урматына кечээ, 2-май күнү «Erem» командасын «Ош» эл аралык аэропортунан салтанаттуу түрдө тосуп алуу аземи болду.

Иш-чарага Ош шаарынын биринчи вице-мэри Саибжан Турдиев, Кара-Суу районунун акиминин орун басары Мехриниса Жороева, Ош шаардык спорт комитетинин төрагасы Кылычбек Саркарбаев, жаш спортчулар катышты. Ош шаарынын биринчи вице-мэри Саибжан Турдиев «Erem» командасын куттуктап, Азия оюндарында да жеңиш менен кайтышын тиледи.

«Erem» өлкө чемпиондугунда Бишкектин «Алга» командасы менен мелдешке түшүп, пенальтиде 2 гол киргизип жеңишке жетишкен. Чемпион команданын машыктыруучусу Данияр Абдраимов жеңиш оңой келбей турганын белгиледи.

«2018-жылдын суперлигасында ким 3 жолу утса, жеңиш ошонуку болуп чечилген. Өткөн жылы 2 жолу жеңиш болсо эле жеңишке жетишчү. Бул жолу жалпы 5 оюн болду. Биз 2 оюнда жеңип, 2 оюнда жеңилип, 5-оюн — чечүүчү беттеш Бишкек шаарында өттү. Жеңүүчү болуу оңой экен, бирок титулду сактап калуу кыйынга турду.

1-12-августка чейин футзал боюнча Азия чемпионаты Индонезияда өтөт. Жалпы 16 команда катышат экен. Биз 3-корзинада ойнойбуз. Ирак, Өзбекстан, Кытай, Кыргызстан болобуз. Эки күчтүү команда болот», - деди Данияр Абдраимов.

Аталган оюнда «Эң мыкты бомбардир» наамына Максат Алимов татыган.

«Мен жалпы 29-30 гол киргиздим. Бул наамды күтүп жаткам. Анткени менден кийинкилер 23 гол киргизген болчу. Алдыдагы максатыбыз — Азия чемпиондугунда жакшы оюн көрсөтүп, ийгиликке жетишүү», - деди М.Алимов.

Команданын капитаны Адилет Култаев: «Башка оюндардан айырмаланып бул чемпиондук 3 жеңишти талап кылып, оюн кызыктуу дагы, оор дагы болду. Жыйынтыгында биз жеңишке жетиштик», - деп кошумчалады.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×